Годишниот извештај за работата на Дирекцијата за заштита на личните податоци (Дирекцијата), дава преглед на сите активности кои се преземени во текот на 2018 година, со цел подигање на нивото на заштита на личните податоци од страна на контролорите , како и преглед на преземените чекори за усогласување на македонското законодавство со законодавството на Европската Унија и на Советот на Европа во областа на заштитата на личните податоци.
Извештајот, најпрво ги прикажува надлежностите, статусот, организациската поставеност и состојбата со човечките ресурси на Дирекцијата, како и потребата од нивно зајакнување како предуслов за гарантирање на нејзиниот независен статус и соочување со предизвиците со имплементацијата на новиот закон за заштита на личните податоци, за да продолжи со приказ на реализираните активности и да заврши со наодите и препораките, како и заклучните согледувања во однос на заштитата на личните податоци.
Дирекцијата во рамки на Работната група на Министерството за правда како надлежно ресорно министерство, откако го достави подготвениот нов Закон за заштита на личните податоци, учествуваше во разгледување на одредбите на Предлог-законот, по што истиот во текот на месец декември беше објавен на Единствениот национален електронски регистар на прописи (https://ener.gov.mk).
Дирекцијата, како дел од Работната група за изготвување и следење на имплементацијата на Планот за реализација на препораките на групата високи експерти за системски прашања од владеење на правото во врска со следењето на комуникациите (2015), активно продолжи со своето учество и придонес во реформите од областа на следењето на комуникациите.
Воедно, Дирекцијата согласно своите планови и цели, во фокусот на своето внимание ги имаше судовите во Република Македонија, за што целосен преглед и осврт е даден како Студија на случај – согледување на состојбите во спроведување на прописите за заштита на личните податоци во судството (прилог бр. 13 I-V).
Во следниот период, Дирекцијата ќе се насочи кон имплементацијата на новиот Закон за заштита на личните податоци чие донесување е неопходност, за која цел ќе ги подготви новите подзаконски акти, а воедно ќе се насочи и кон поддршка на контролорите за имплементација на истите.
Оттука, во Извештајот се содржани и главните препораки за наредниот период кои се однесуваат на донесување на новиот Закон за заштита на личните податоци и интензивното усогласување на работата на контролорите и обработувачите со истиот, како и зајакнувањето на независниот статус на Дирекцијата, како основен предуслов за целосна имплементација на новиот закон.
